Dinamizar e poñer en valor os espazos verdes é un dos obxectivos do Concello de San Sadurniño desde hai máis dunha década. O proxecto “Terra de vida”, xestionado pola cooperativa Rexenerando, naceu para visibilizar os terreos da Cortiña, un ecosistema de gran valor na localidade, a través de percorridos e obradoiros para escolares e familias.
A Ruta da Natureza é un itinerario circular de tres quilómetros que une diferentes puntos de interese á beira do Xuvia. O percorrido comeza no Pazo da Marquesa, un edificio que alberga actualmente a Casa do Concello e que data do século XVI. A edificación, vinculada ao Señorío de San Sadurniño e ao posterior Marquesado, foi un espazo de referencia para a aristocracia española nos inicios do século XX, coa visita de políticos, escritores ou mesmo do rei Alfonso XIII.
Os exteriores do pazo están deseñados conforme á moda dos xardíns franceses da época, con elementos decorativos exóticos e con gran variedade botánica foránea. O camiño segue á marxe do Xuvia, con paradas para continuar explorando a zona a través dos sentidos, con historias e contos que fomentan a educación e o respecto ambiental.
Neste contorno sitúase o arboreto, un xardín botánico composto por unha mostra das especies arbóreas máis representativas de Galicia: a carballeira, o souto, o bidueiral, o bosque de ribeira, o faial, o sobreiral e a fraga. A Fraga Máxica completa este espazo con figuras de madeira deseñadas polos artistas locais Carlos García e Marina Goti. Trasnos, gnomos, dragóns e outros animais mitolóxicos ou de fábula en gran formato intégranse nun contorno que deixa espazo á imaxinación.
No recinto atópase tamén a horta de froiteiras de Carlos Fornos, con máis de 500 exemplares de diferentes especies, que naceu co obxectivo de recuperar as variedades autóctonas en perigo de extinción. E ademais, nos arredores atópase o apiario didáctico, no que aprender sobre a vida das abellas.
O arboreto e a horta teñen un gran valor ambiental e forman parte da Rede Natura, onde tamén se inclúen o paseo fluvial, o río Castro e a serra do Forgoselo. Ademais, a zona de San Sadurniño está inserida no Xeoparque do Cabo Ortegal, que obtivo recentemente o recoñecemento da Unesco pola súa riqueza xeolóxica e que ofrece diferentes xeorrutas polo municipio.
Rexenerando ofrece tamén obradoiros de educación ambiental e consumo responsable, cos que explorar os espazos verdes combinando lecer e contacto coa natureza.
San Sadurniño conta con variedade de actividades para facer en familia ou coa escola. Durante o ano celébranse eventos como a Carreira Popular, a Feira Rural ou a da Plantación.