As Fragas do Eume son un dos bosques atlánticos de ribeira mellor conservados de Europa. O parque natural, que conta con 9.000 hectáreas de extensión, distribúese polos municipios de Pontedeume, As Pontes e Monfero.

Para coñecer estes exuberantes bosques ao carón do río Eume o mellor é facelo a pé a través dalgunha das diferentes rutas que percorren o parque. Este río, duns cen quilómetros de lonxitude total, labrou un profundo canón, no que se conserva o manto vexetal orixinal dos bosques atlánticos. Carballos, chopos, freixos, amieiros, máis de 20 especies de fentos e 200 de liques converten estas fragas nunha heteroxénea selva. Ademais do gran valor vexetal do parque, as Fragas do Eume contan con máis de 100 tipos de aves e diferentes mamíferos e peixes, entre os que destacan especies endémicas como a ra ibérica.

Para facer nunha xornada en familia ou co alumnado, unha das rutas máis recomendadas é “O secreto do Eume”. Este é o itinerario ideal para coñecer a diversidade vexetal das Fragas e o Mosteiro de Caaveiro, un antigo templo agochado no corazón do bosque, que foi erixido sobre un montículo rochoso rodeado polos ríos Eume e Sesín. Recentemente rehabilitado, este cenobio románico do século X, conta cunhas vistas espectaculares das fragas. Ademais, o recinto posúe un centro de interpretación no que se poden coñecer con maior profundidade as distintas estancias que albergaba o mosteiro: as igrexas, a sancristía, o cabido, o arquivo, a torre do campanario etc.