A revista DeExcursión chega ao seu segundo ano de vida con máis rutas e novos proxectos. Na revista en papel e nesta web, iniciativa da axencia Pingota Comunicación, atoparedes un catálogo de propostas para que os profesores programen saídas fóra da aula e calquera poida ir de excursión por Ferrol, Eume e Ortegal. A publicación nace co devezo de dar a coñecer os variados recursos que ofrecen as comarcas e coa intención de contribuír a vertebrar estes territorios, acercando a través do alumnado municipios próximos que, máis a miúdo do desexable, son grandes descoñecidos.
Para aprender é precisa a emoción. É o elemento que está sempre presente nas excursións fóra da aula, nas viaxes para descubrir cousas novas da man do mestre ou da mestra. Esta publicación quere ser un elemento de axuda á hora de planificar as saídas escolares deste curso. Este é un recurso para a sala do profesorado, da man de todos, para que cada quen busque o destino que máis se axusta a idade e ao interese do seu alumnado. Pero tamén é una ferramenta útil para familias que buscan ideas para ir de excursión por Ferrol, Eume e Ortegal, sexan turistas ou propios que queren coñecer mellor o territorio.
Nestas páxinas os docentes atoparán moitas rutas diferentes, todas abordables nunha xornada escolar e tamén algunhas que ofrecen a posibilidade de prolongar a estadía varios días, facer noite e desenvolver máis actividades. DeExcursión aporta teléfonos de contacto das institucións ou asociacións, algunhas con voluntarios que desinteresadamente farán de guías, para facilitar a organización da viaxe.
A axencia Pingota Comunicación, que puxo en marcha este proxecto no verán do 2016, ten atopado no camiño a complicidade da meirande parte dos concellos destas tres comarcas, doutras institucións como a Autoridade Portuaria e a Deputación Provincial da Coruña -que entenderon a importancia de poñer en valor o interese didáctico do local- e de moitas empresas. Neste segundo ano de vida aumentan os colaboradores -dámoslle a benvida á Fundación Exponav, ao Proxecto Esmelle e aos novos concellos- e tamén o número de páxinas. Ademais, a publicación abriu unha liña de cooperación co Centro de Formación e Recursos de Ferrol da que, entre outras cousas, sairá un mellor coñecemento mutuo.
De novo presentamos unha revista cun coidado deseño, para espertar a emoción da viaxe desde o momento da elección do destino. Vaia por diante o noso convencemento de que paga a pena saír a descubrir os recursos didácticos que temos espallados polo cotián, e non confiar de máis en experiencias enlatadas. Ir de excursión por Ferrol, Eume e Ortegal é unha aventura apaixoante e de seguro que, mesmo os veciños destas comarcas, poderán descubrir cousas nesta web.
Deixádevos levar unha vez máis polo vento do Nordés, como fan os pequenos da nosa portada, e vivide as aventuras que vos propón DeExcursión.
Boa viaxe!
