CARIÑO
VILA E NATUREZA
Casa do Concello
Avenida da Paz, 2
Tel. 981 405 064
www.concellodecarino.galFolletos sobre a Rede Natura e itinerarios polo complexo xeolóxico do cabo Ortegal descargables en:
www.concellodecarino.gal/que-facer-ver/
Cariño é unha vila mariñeira situada na entrada da ría de Ortigueira. O seu casco histórico está composto por estreitas casas de cores, con balconadas e galerías típicas da arquitectura mariñeira. Outro dos atractivos da localidade son as súas praias, como a da Concha e Basteira, situadas na zona urbana, con area branca e augas cristalinas.
Desde o barrio mariñeiro se pode acceder mediante unhas escaleiras á pequena cala de Peiral do Campo, formada por pedras e area branca. Máis lonxe se atopa un dos areais máis bonitos do municipio, o de Fornos, unha praia semiurbana ideal para a práctica de surf ou deportes náuticos.
A contorna natural do municipio posúe un valor inestimable. Resulta recomendable realizar a Ruta dos Miradoiros, un itinerario de 25 km que percorre toda a serra da Capelada e remata en Cedeira. A só catro quilómetros de Cariño temos o Cabo Ortegal e o seu característico faro, levantados sobre unha península montañosa con cantís que alcanzan os 300 metros de altitude, onde conflúen as augas do Atlántico e do Cantábrico.
Desde este enclave é posible contemplar Os Aguillóns, unhas curiosas pedras con forma punzante que emerxen desde o mar cara a superficie. Algúns estudos indican que estas rochas poderían ser as cuartas máis antigas do planeta. No medio de ambos extremos da península atópase a Enseada da Cova, un gran arco no que emerxen formacións rochosas coma a “Longa da Moreira”, de gran altura e rematada en pico. O lugar é accesible en coche e ten espazos habilitados para estacionar.
O miradoiro do Limo, o da Miranda, o da Vixía de Herbeira… son outros puntos da ruta.
Este litoral conta case na súa totalidade con algún tipo de protección ambiental debido ao seu valor paisaxístico e xeolóxico. Neste punto hai unha concentración única de rochas de orixe metamórfico entre as que se contan anfibolitas, granulitas e gneises. Aquí tamén se pode ver o maior e mellor afloramento de ecloxitas do mundo.
Ademais, este é un espazo de gran valor ornitolóxico, pois pódense observar numerosas especies de aves. Paxaros de todo o mundo elixen Cariño para facer unha parada durante a súa viaxe migratoria. É unha oportunidade única para propoñerlles aos escolares unha xornada de inmersión na natureza e ver de cerca estes animais.
Desde o punto de vista económico, a vila estivo intimamente ligada ás fábricas conserveiras desde o século XX, que constitúen boa parte da paisaxe arquitectónica do municipio. Actualmente segue en activo “La Pureza”, fundada no 1924 e que se dedica á elaboración artesanal de conservas de peixe e marisco e vexetais. Conta tamén coa súa propia marca de marmeladas. A empresa permite as visitas escolares consultando previamente a dispoñibilidade do persoal.
Idades: De Infantil a Bacharelato
Materias: Ciencias Naturais, Bioloxía e Xeoloxía, Ciencias Sociais, Xeografía e Historia, Educación Física
Recompendacións: A zona do cabo é de fortes ventos polo que é necesario levar roupa de abrigo todo o ano
Máis información: Neste enderezo pódese acceder a folletos con información sobre rutas por Ortegal e demais
www.concellodecarino.gal/que-facer-ver