O patrimonio ambiental de Neda é enorme, sendo a auga un dos bens de maior relevancia do municipio, tanto polo seu valor natural como polo seu uso en diferentes industrias.
Un espazo de gran relevancia é a Fervenza do Río Belelle, que con 45 metros de caída ofrece unha das paisaxes fluviais máis impresionantes da comarca. Na base hai diferentes pozas nas que adoitan mergullarse os máis atrevidos durante a época estival. O mellor momento para visitala é no outono e no inverno, pois o caudal do río aumenta e a auga cae con moita máis forza e intensidade.

Pode ser de interés a guía “O río Belelle ao natural”, que está a disposición das persoas interesadas na Biblioteca Municipal e que é obra do profesor Lois Anxo Rodríguez. Nela hai diferentes propostas para desenvolver experiencias e actividades sinxelas con nenos e nenas de distintos niveis educativos nesta extraordinaria contorna.
Hai varias rutas pola zona, unha delas é circular e comeza no pazo de Isabel II, que foi unha antiga fábrica de tecidos inaugurada en 1843. Ao seu carón hai unha pequena área para estacionar. O camiño avanza á beira do río Belelle, onde no pasado chegaron a existir ata 40 instalacións tales como muíños, fábricas ou ferrerías. No primeiro tramo do roteiro pásase xunto ao muíño da Barcia e a central hidroeléctrica de Neda, que comezou a funcionar a principios do século XX e que na actualidade segue en activo.

Unha vez cruzas o río pódense escoller diferentes itinerarios. Un deles conduce ata os pés da fervenza, mentres que outro ascende pola ladeira da montaña ata un miradoiro-cenador de madeira desde o que se pode apreciar a caída da auga da fervenza. Outro itinerario permite subir ata o miradoiro de Viladonelle, desde onde hai unhas incribles vistas da paisaxe.
A auga é un elemento moi prezado para Neda. A súa calidade está ligada ao seu produto máis popular, o pan. É coñecida como a capital do trigo de Galicia polo seu riquísimo pan, cun sabor e textura que o fan realmente especial. Tal é a importancia, que a primeira semana de setembro desde hai máis de 30 anos, organizan a coñecida como Festa do Pan.