A ruta xacobea continúa por Narón, nun camiño sinxelo de aproximadamente seis quilómetros. Comeza na enseada da Gándara e remata na desembocadura do río Xuvia. Para facer aínda máis interesante o percorrido é posible solicitar o acompañamento do historiador municipal, Andrés Pena Graña.
A primeira parada é o mosteiro de San Martiño de Xuvia, un cenobio románico cuxa orixe se remonta ao século IX e que viviu o seu maior esplendor no XII, cando se adheriu á orde de Cluny. Pódese visitar o interior concertando previamente unha visita co párroco. Declarado como Ben de Interese Cultural, é tamén o inicio da ruta que vai ata Santo André de Teixido, marcado no percorrido coa icona dun peixe en cor vermella.
Continuando polo camiño do Salto e logo polo de Outeiro, chégase ata o muíño das Aceas, que foi declarado Real Fábrica de Fariñas en 1798. Empregaba enerxía combinada de auga de ríos e mares que se acumulaba na súa presa, o que lle permitía moer grandes cantidades de trigo.
Seguindo as vieiras amarelas aparece no paseo marítimo de Xuvia a pedra que marca os 100 quilómetros que faltan ata Santiago, punto de partida mínimo para quen queira obter a “compostela”. Ao seu carón están instaladas unhas letras xigantes de Narón e o Camiño Inglés, que converten o espazo en parada fotográfica case obrigatoria. Neste gran parque pódese aproveitar para xantar, descansar ou seguir xogando.
Ademais, o Concello vén de instalar en colaboración coa Asociación Sociocultural ASCM catro códigos QR que conforman unha xincana enfocada ás persoas con mobilidade reducida. Ao escanealos accédese a unha audioguía na que se explican diferentes curiosidades sobre a zona. É unha nova experiencia, pois é a primeira xincana turística dixital e inclusiva do país.
Para rematar co tramo, despide a localidade un lonxevo magnolio cun tronco de máis de seis metros de perímetro, o maior da súa especie en Galicia e un dos máis antigos do continente. E moi próximo, o muíño de Xuvia, que a comezos do século XIX foi o principal muíño do país, abastecendo de fariña a toda a comarca e exportando gran parte da produción.

O Camiño Inglés pasa polo municipio de Fene nun itinerario sinxelo de arredor de tres quilómetros de lonxitude. A ruta percorre tanto zona urbana como áreas de natureza, polo que é posible gozar de paisaxes e boas vistas da ría, desde as que se divisa o emblemático guindastre de Navantia e os “jackets” que son xa outro sinal de identidade do estaleiro fenés, á vez que facer algunha parada nalgún punto de interese patrimonial.

O camiño parte do lugar de Conces e continúa ata a rúa Fonte do Campo para chegar ao lugar da Casanova. Tras cruzar a estrada N-651 atopamos a Casa do Concello. Na propia vila é interesante facer unha visita á igrexa do Divino Salvador, datada no século XVIII, ou ao Museo do Humor Xaquín Marín (ver páxina), moi atractivo para a rapazada.

No remate da avenida do Concello, débese xirar á esquerda para tomar a dereita na rotonda, cara a rúa Alcalde Xerardo Díaz. Por aquí se vai chegar ao lugar de Mundín, no que hai un antigo lavadoiro moi fotografado. Nesta zona atópase un bosque de árbores caducifolias e eucaliptos polo que se volve á N-651.
Desde o lugar de Rego da Moa chégase ata Romariz, onde a través dunha pista de terra rodeada de hortas encaramos a zona final do itinerario do Camiño Inglés en Fene, no polígono Vilar do Colo, un centro industrial que conecta co veciño concello de Cabanas.