A tradición pesqueira é o motor desta vila, coñecida dentro e fóra de Galicia pola calidade do seu peixe e do seu marisco. En 2009, a ría cedeiresa foi declarada Reserva Mariña de Interese Pesqueiro, unha distinción que promoveu a protección e a explotación sostible do fondo mariño. O Concello leva anos traballando na posta en valor do patrimonio mariñeiro, sobre o que é posible consultar diferentes recursos na súa web.

Para que os pequenos poidan descubrir en profundidade a vida mariñeira, é indispensable concertar unha visita coa confraría para visitar a Lonxa de Cedeira. Aquí os escolares poderán coñecer de cerca como é o funcionamento das instalacións, o procedemento de compra-venta de peixes e mariscos, os métodos de etiquetado e as técnicas de pesca que se empregan na zona.

Para completar esta xornada e seguir aprendendo sobre a vida do mar, é de grande interese achegarse ata o Museo Mares de Cedeira, que abriu no ano 2016 e desde entón non para de aumentar grazas as diferentes doazóns da veciñanza.

Neste centro podemos atopar embarcacións, útiles de navegación, aparellos de pesca, fotografías… Unha das coleccións destacables do museo é a de malacoloxía, cedida por Manuel Suárez, que conta con máis de 5.000 cunhas de bivalvos e gasterópodos.

É posible concertar visitas guiadas para centros escolares, así coma tamén se pode solicitar a organización de diferentes actividades lúdicas. Para o alumnado de maior idade, obradoiros nos que aprender a facer nós mariñeiros ou lectura de cartas náuticas. E para todas as idades, un xogo de pistas agochadas polas instalacións coas que teñen que chegar ata unha mensaxe oculta.

Este museo está integrado na Rede de Espazos Museísticos Atlánticos (REMA), á que tamén pertencen outros espazos de difusión do patrimonio marítimo e pesqueiro de Galicia, Asturias e Portugal.

En maio pasado chegou a esperadísima confirmación de que o Xeoparque Cabo Ortegal entra na rede da Unesco, un recoñecemento que confirma a todo o conxunto, e en particular á Serra da Capelada como un conxunto montañoso singular e único no mundo, con paisaxes espectaculares e particularidades xeolóxicas que é apaixoante descubrir.

A Capelada destaca por posuír os cantís máis altos da Europa Continental, con incribles vistas da costa do noroeste atlántico. Na garita da Herbeira, unha construción de pedra do século XVIII que servía para a vixilancia costeira é onde se sitúa o punto de maior altitude: a 620 metros de altura sobre o nivel do mar. Desde este miradoiro se poden divisar as illas Sisargas e a Punta de Estaca de Bares. Son moi recomendables as “xeorrutas” –consultar a páxina específica do Xeoparque-, diferentes percorridos guiados que configuran interesantes leccións de xeografía sobre o terreo.

Unha das actividades novidosas que se poden facer na Capelada é o percorrido pola vía ferrata “Senda do Santo”, de momento é a única vía ferrata de Galicia. Trátase dun percorrido para practicar a escalada por paredes verticais e horizontais, preparados cos oportunos banzos, cravoz, pasamáns, cadeas, pontes ou tirolesas para superar as dificultades sen necesidade de ter experiencia na disciplina. Porén, é unha actividade de risco e o Concello ten publicado un reglamento de uso que é preciso consultar. En xeral, os grupos de menores –poden participar a partir dos 12 anos, sempre nas condicións especificadas no reglamento- deben organizar o percorrido a través dalgunha das empresas de turismo activo autorizadas.

Desde a vía ferrata as vistas ao mar e os cantís son impresionantes, pero tamén se pode ver no medio deste fermoso paraxe o pobo de Santo André de Teixido, ao que, segundo di a tradición, “vai de morto quen non foi de vivo”. Envolta en lendas e mitos, esta vila é un espazo de culto relixioso desde tempos prerrománicos, que nos últimos anos está espertando cada vez máis interese turístico. O seu santuario é o segundo maior centro de peregrinaxe de Galicia despois de Santiago de Compostela.

Na contorna é habitual toparse con cabalos e vacas en liberdade. Unha vez ao ano, en xuño, celébrase a rapa das bestas, unha tradición ancestral na que os cabalos son guiados ao recinto do curro para cortarlles as crinas.

Ademais, pola Capelada e Santo André de Teixido vai o chamado Camiño do Mar, unha variante do Camiño do Norte que está en proceso de ser recoñecido como Ruta Xacobea a Santiago e que ten a particularidade de ser o único itinerario que pasa polos dous puntos de peregrinación de Galicia.