A educación artística, fundamental para o desenvolvemento da creatividade e a sensibilidade dos nenos e nenas, ás veces é un ámbito desatendido por falta de inclinación dos pequenos. Unha visita ao Museo do Humor de Fene, que recentemente cambiou a súa denominación pola de Museo Xaquín Marín, é un bo comezo para incentivar o interese dos máis novos pola arte e ao mesmo tempo axudar a desenvolver o seu sentido do humor, tan necesario para a xestión saudable das emocións. A través das obras de salientables humoristas galegos como Siro López, Reimundo Patiño, Xaquín Marín ou Luis Davila, a rapazada poderá deixar voar a súa imaxinación, rir e aprender.
Precisamente, o debuxante Xaquín Marín foi quen fundou o museo en 1984, un ano despois de percorrer Galicia xunto con Siro López difundindo un manifesto en defensa do humor galego, un ben inmaterial que consideraban en perigo de extinción.
O museo alberga unha exposición permanente que conta con arredor de 300 pezas do máis variado: ilustracións orixinais, divertidas esculturas ou espellos cóncavos e convexos son algunhas das súas atraccións que se poden atopar nas súas salas.
Pódese solicitar unha guía para que a visita polo museo sexa máis divertida e, ademais, organízanse obradoiros artísticos para todas as idades nos que materializar as ideas e creatividade do alumnado.
O museo estreou recentemente na súa web un espazo de percorridos virtuais polas súas instalacións que se pode mostrar na aula antes da visita para suscitar o interese dos alumnos polo que se van a atopar. Unha desas exposicións é a antolóxica de Xaquín Marín, que xa non está dispoñible no museo pero que é posible coñecer virtualmente como complemento da visita física.