DEEXCURSIÓN

A revista DeExcursión naceu no ano 2016, por iniciativa da axencia Pingota Comunicación, como un recurso ao servizo do profesorado para a organización das súas saídas escolares, tanto didácticas como meramente de convivencia. A publicación é un catálogo de rutas e visitas por concellos das comarcas de Ferrol, Eume e Ortegal, na que se atende especialmente a aquelas cuestións que son importantes nunha viaxe en grupo.

Os concellos de Ferrol, Narón, Neda, Fene, As Pontes, San Sadurniño, Moeche e Cedeira, así como o Proxecto Esmelle colaboran co proxecto, que lles brinda as súas páxinas para contar os excelentes recursos que ofrecen ao profesorado. Apoia tamén a súa publicación a Deputación da Coruña, que aproveita a revista para difundir os valores didácticos do mosteiro de Caaveiro e as Fragas do Eume e do Xeoparque Cabo Ortegal da Unesco. Cómpre agradecer tamén o respaldo dos anunciantes, empresas con servizos especificamente dirixidos ás comunidades educativas que atopan en DeExcursión unha canle de comunicación con elas.

Coa única ausencia do ano 2020, marcado polas limitacións da pandemia, a revista imprímese cada ano e chega por correo, no mes de setembro, a todos os centros educativos da provincia da Coruña. Xunto coa súa difusión en formato papel, a publicación está tamén nesta web dispoñible para a súa descarga gratuíta

DeExcursión é unha ferramenta para saír das aulas, para buscar a aprendizaxe máis vívida. Serve tamén para o ocio familiar, polo que a través das redes sociais do proxecto –Facebook e Instagram- promocionamos ao longo de todo o ano as rutas que aparecen na publicación e outras actividades que organizan os concellos colaboradores.

Confiamos en que atopedes destinos de interese en DeExcursión. Estades todos e todas invitadas a viaxar con nós!!