Miúdo Verán en Neda

O Concello de Neda activa o programa de lecer “ Miúdo verán. Cultura en familia ”. A cuarta edición deste ciclo incluirá ao longo dos meses de xullo e agosto espectáculos e proxeccións cinematográficas ao aire libre en distintos escenarios do municipio para público familiar. Espectáculos “Miúdo verán” arrincará o xoves 17 , ás 20 horas, na contorna do albergue de peregrinos , co espectáculo “ O afiador ”, protagonizado polo coñecido Mago Teto . As historias dos afiadores, que percorrían milleiros de quilómetros coa única compaña da súa roda chega á escena coa axuda do ilusionismo. E faino nun show que emprega os elementos típicos dos afiadores (coitelos, tesoiras, navallas, paraugas…) para os efectos de maxia. A seguinte cita será o xoves 31 de xullo , ás 20 horas, no Parque do Principiño . Neste espazo de xogo, Fran Rei e Félix Rodríguez presentan “ Máis saaabor! ”, unha proposta de sobre o mundo da gastronomía e da alimentación saudable, que mestura música en directo, maxia, e moito humor. E xa o xoves 7 de agosto , ás 20 horas, no Campos dos Subarreiros , Cía. SU.MA (Sue Moreno y María Move) sorprendera ao público con “ Ikigai ”, un espectáculo de danza-circo sobre a superación persoal e o sentido da vida, no que non faltan os xogos, as acrobacias aéreas e a ópera. Cinema Finalmente, da man da Rede Cultural da Deputación, haberá dúas sesións de cinema de verán. O martes 12 de agosto , ás 22 horas, na contorna do albergue , exhibirase a película española Salta!! , unha irresistible comedia familiar sobre a complicada relación de dous irmáns adolescentes. O martes 19 de agosto , ás 22 horas, na Rúa Real , a encargada de pechar este ciclo de actividades será a cinta de animación Migración . Unha viaxe patas arriba. Todas as actividades serán de balde .

Durante o este mes de xullo o Centro de Interpretación dos Muíños Industriais de Xuvia organiza dous obradoiros cos que pasalo en grande. Son actividades dirixidas a rapaces a partir de 4 anos. Repicando : Sabedes que é unha moa? Os rapaces crearán unha réplica en miniatura e descobrerán como funcionaban os muíños fariñeiros e os coidados que precisaban para non parar nunca de moer Coas mans na masa : Transformarán ingredientes sinxelos nunha masa caseira coa que crear figuras de pan decorativas. Mentres amasan, coñecerán como se moía o gran e se facía o pan no muíño e na panadería da familia Lestache. Para participar é preciso facer unha reserva en www.cimixnaron.gal

Cinema Familiar en Cedeira

O Concello de Cedeira organiza varias xornadas de cinema adicadas a público familiar. As exhibicións terán lugar no Auditorio Municipal de Cedeira, ás 20.00 h . O 7 de xullo dará comezo este programa con Del Revés . O 14 de xullo seguirán con Del Revés 2 , secuela de Del Revés. O seguinte filme será Vaiana o día 21 de xullo. E para rematar o mes, o día 28 de xullo, exhibirase Vaiana 2 , a secuela de Vaiana. Para comezar o mes de agosto e concluír coas xornadas de cinema, Robot Salvaje será o encargado de facervos desfrutar do cinema en Cedeira. As entradas serán de balde para os socios da ANPA, mentres que aqueles non socios deberán abonar 3€.

Exposición de fotografía – Serafín Lorenzo en Ferrol

Este 5 de xullo inaugurase na parroquia de Esmelle, en Ferrol, unha exposición fotográfica que recupera a obra olvidada de Serafín Lorenzo, coñecido como "Cazolitos". Un fotógrafo aficionado que documentou a vida rural da zona de Ferrol dende mediados do século XX. Proxecto Esmelle rescatou arredor de 1500 negativos do Centro Galego de Artes da Imaxe para poder ser expostos no Museo Pérez Porto. A obra recolle escenas da vida cotiá homenaxeando aos seus protagonistas. Poderá visitarse todos os sábados de xullo e agosto, de 10.00 a 13.00 h . Nese mesmo horario poderase visitar tamén o resto do museo.

Festa Infantil en Fene

Este venres 4 de xullo , con motivo do ciclo de xullo que celebra o Concello de Fene , terá lugar unha festa infantil con inchables, xogos de auga, festa da escuma, touro mecánico (ou simulador de tabla de surf), maquillaxe, photocall, circuito de karts a pedais e animación a cargo de La Guagua. O evento está organizado pola Concellería de Cultura no horario de 17.30 a 20.30 horas , na Praza do alcalde Ramón J. Souto González , a carón da Casa do Concello. Todas as actividades totalmente de balde .

Deporte na Rúa en Fene

O domingo 6 de xullo , no Concello de Fene , celebrarase a xornada do Día de Deporte na Rúa , que incluirá múltiples actividades deportivas e de lecer para todos os públicos. Un dos grandes atractivos desta nova edición, sen dúbida, será a tirolina xigante que voltará a Fene instalándose na Avenida do Tarrío. O horario da mesma será: o domingo, de 10.00 a 14.00 e de 17.00 a 20.00, e o luns, de 17.00 a 20.00 horas. A maiores, o domingo pola mañá haberá en Perlío diferentes espazos para practicar tenis, judo, defensa persoal, pilates, taekwondo, karate, orientación, xadrez xigante, fútbol, pintadas, futbolín humano inchable, tobogán inchable, inchable de saltos con obstáculos, remo con pantalla, esgrima, chave, boccia, slackline, baloncesto en cadeira de rodas, baloncesto 3x3, hockei, indiaka, bádminton, carreiras de velocidade e pickleball. Tamén se anuncian obradoiros de valoración funcional, de circo (malabares e equilibrismo), de elaboración de chapas, circuito en cadeira de rodas, circuito de karts e zona xigante de xogos tradicionais. A participación en todas as actividades será de balde e as persoas que participen en tres actividades, poderán facerse cunha camiseta conmemorativa da xornada, até esgotar existencias. Desenvolverase de 10.30 a 14.00 horas na avenida do Tarrío, rúa San Salvador e arredores do CCRD de Perlío . En caso de choiva, trasladarase ao interior do pavillón A Xunqueira de San Valentín.

“Tempo de encontros” en Neda

O Concello de Neda pon en marcha o venres 4 de xullo , “ Tempo de encontros ”. Esta nova iniciativa busca favorecer a relación entre veciños e veciñas de todas as idades , contando co parchís e outros xogos de mesa como aliados. A cita terá lugar na contorna da Casa das palmeiras . Nesta primeira entrega, a modo de proba, o Concello sacará á rúa os clásicos taboleiros de parchís e xogo da oca para desfrutar dunha tarde de venres – de 19 a 21 horas - lúdica e entretida, á que se pode sumar xente de todas as idades que queira pasar un bo rato. Con todo, quen se achegue a “Tempo de encontros” non só poderá desfrutar do milenario parchís, o xogo familiar por excelencia, ben útil para adquirir habilidades estratéxicas. Así, o Concello porá á súa disposición outras opcións, buscando chegar a variedade de gustos. Ademais dunha forma entretida de pasar o tempo, os xogos de mesa, melloran a memoria e a concentración e, por riba de todo, fomentan a interacción social. Así, a iniciativa municipal explora as posibilidades do xogo ao aire libre para xuntar á veciñanza, brindando unha escusa para reunirse, contribuíndo a acabar con situacións de soidade non desexadas.

"Pegadas de Castelao" en San Sadurniño

O próximo 18 de xullo "Pegadas de Castelao" achegarase ao Concello de San Sadurniño co obxectivo de difundir a figura e a obra de Castelao en todas as súas facetas: escritor, político, artista, promotor cultural, médico, etc. dunha forma amena e divertida. Para lograr ese obxectivo, a compañía Migallas Teatro combina diferentes técnicas dramáticas: monicreques de silueta, de luva e cabezudos inspirados nos debuxos e relatos de Castelao, teatro de actor, pantomima, cantar de cego, etc. todo acompañado por música en directo de cantigas populares vinculadas á súa vida e obra. Tal e como o seu nome indica, "Pegadas de Castelao" tenta amosar as profundas pegadas que deixou Castelao na historia e na cultura de Galicia, así como avivar o interese por afondar no coñecemento da súa vida, da súa obra e do seu pensamento. A obra está dirixida a todos os públicos a partir dos seis anos . María Campos e Carlos Yus dirixen e protagonizan esta montaxe encadrada nos actos do Ano Castelao á que podedes asistir na Casa da Cultura do Concello de San Sadurniño, a partir das 11:00 h , acompañando á rapazada da Aldea de Verán.

O Mago Antón en Narón

O Mago Antón presenta este domingo 29 de xuño no Parque do Río Freixeiro , en Narón, o seu espectáculo "Mil maxias máis". A función trata sobre a lingua galega e conta cunha chea de xogos orixinais que teñen como finalidade facer que os espectadores recorden a importancia da palabra en galego. Cada sesión desenvolverase a bordo do magomóbil, un vehículo especialmente deseñado para espectáculos esta exhibición de ilusionismo e lingua. Trátase dun vehículo de 13 metros de longo perfecto para espectáculos de maxia de salón. O espectáculo está dirixido a público familiar . A entrada será de balde ata completar o aforo, 30 espectadores por función, por orde de chegada.

Campamento dixital en San Sadurniño

O Concello de San Sadurniño ofrecerá en agosto un Campamento Dixital de balde para rapazada de entre 9 e 17 anos, organizado dentro do programa estatal de fomento das competencias dixitais na infancia -CODI- que desenvolve o Ministerio de Xuventude por medio da Fundación Cibervoluntarios. O campamento inclúe actividades, retos e misións adaptadas a cada idade co obxectivo de fomentar un uso seguro, crítico e creativo das tecnoloxías . A rapazada aprenderá a manexar ferramentas para crear contidos, recoñecer información fiable, coidar a súa privacidade e moito máis. Todo nun ambiente dinámico e participativo. Será unha gran oportunidade para que a mocidade se forme e divirta ao mesmo tempo durante as vacacións de verán, adquirindo competencias clave para o seu futuro persoal e profesional. As actividades terán lugar na Aula CeMIT e dividiranse en dous grupos por idades: os días 11, 13, 15, 26 e 28 de agosto para nen@s de 9 a 13 anos, e os días 12, 14, 25, 27 e 29 de agosto para moz@s de 14 a 17. A participación é totalmente gratuíta . Horario de 09:00 a 14:00 h. As inscricións están xa abertas ata completar as prazas dispoñibles, que son limitadas. Só hai que contactar co Aula CeMIT do Concello de San Sadurniño a través do teléfono ou WhatsApp no 616 016 793, ou ben enviar un correo electrónico a cemitsansadurnino@xunta.gal.

Eventos en 1 septiembre, 2024 – DeExcursión: rutas escolares por Ferrol, Eume e Ortegal

No hay eventos programados para 1 septiembre, 2024. Ir a los próximos eventos.

No hay eventos programados para 1 septiembre, 2024. Ir a los próximos eventos.

Lista
Mes
Día