Canido é un barrio singular, entre outras cousas, polas obras de arte que decoran as súas fachadas. Aquí se celebra cada ano un festival de arte urbana para reunir a diferentes artistas que embelecen as edificacións coas súas obras cheas de cor e orixinalidade.
Esta iniciativa partiu do pintor Eduardo Hermida, quen comezou a intervir nos espazos abandonados e en proceso de deterioro do barrio a causa da crise económica co obxectivo de combater a tristeza na que estaban sumidos. Para iso, inspirouse en Las Meninas de Diego Velázquez, reinterpretándoas de forma libre e moderna. A el sumáronse moitos máis artistas, dando comezo ao que hoxe coñecemos como un dos principais recursos turísticos da cidade de Ferrol.
O festival das Meninas ten lugar durante os primeiros días do mes de setembro e logrou que Canido conte con máis de cincocentas obras, que decoran as súas rúas, contribuíndo á revalorización do barrio mediante a arte.
Coas Meninas, a zona converteuse nun referente do muralismo, un movemento artístico e cultural que consiste na creación de pinturas a gran escala sobre muros e paredes, que comunican diferentes mensaxes con propósito social, político ou cultural.
As Meninas de Canido foron recoñecidas como Itinerario Impresionista de Street Art polo Consello de Europa e pódense visitar en calquera momento do ano, co propio Hermida como guía, reservando con antelación. O percorrido das obras está disposto nunha ruta onde descubrir as diferentes creacións de arte e achegarse a coñecer a historia do proxecto paseando polas rúas do barrio.
Reservas e máis información:
meninasdecanido2008@gmail.com , www.facebook.com/meninasdecanido
Folleto informativo con mapa de ruta:
visitferrol.com/wp-content/uploads/2022/04/FOLLETO-MENINAS.-OP2.pdf
