O Museo da Construción Naval Exponav reúne nun edificio do século XVIII do Arsenal toda a evolución desta actividade desde as primeiras embarcacións ata a carpintería de ribeira e, finalmente, os modernos estaleiros industriais, e constitúe unha visita imprescindible para achegarse tamén á historia da cidade de Ferrol.

O inmoble que o acolle son unhas antigas ferrerías da Armada, que conserva as súas características chemineas, os pozos dos que se obtiña a auga doce para traballar o ferro e as fraguas. Un dos elementos que máis chama a atención dos escolares é, precisamente, a recreación dunha antiga fragua co mestre, o oficial e o aprendiz.

A mellor foto de grupo é coa reprodución dunha caderna xigante (o “esqueleto” do barco)

 

O percorrido pola planta baixa inclúe maquetas de todo tipo, barcos reais e salas dedicadas aos sistemas de propulsión, os planos e o traballo de oficina, a soldadura, etc. Pero sen dúbida a parte máis importante do museo son os restos da fragata Magdalena, que naufragou no ano 1810 e que hoxe podemos ver xunto cunha maqueta de grandes dimensións e outra máis pequena.

No primeiro piso explícase a construción naval desde o século XVIII -cando esta actividade fixo de Ferrol a cidade que hoxe é- ata a Navantia actual. Tamén se pode visitar unha interesante mostra de faros e sinais marítimas.

O museo organiza visitas guiadas para estudantes adaptadas a cada grupo de idade, desde os máis pequeniños -que poderán vivir unha aventura pirata e coñecer á mascota Cormonav- ata o alumnado de Bacharelato ou Formación Profesional. Tamén prepara obradoiros de diferentes temáticas entre os que teñen moito éxito os dedicados a aprender a facer nós mariñeiros.

Horarios:
Temporada baixa: de martes a venres de 10:00 a 14:30 e de 15:30 a 19:00; sábados de 10:00 a 19:00 e domingos de 10:30 a 14:30
Temporada media (de maio a mediados de xuño e de mediados de setembro a finais de outubro): de martes a sábado de 10:00 a 19:00 , domingos de 10:30 a 14:30
Temporada alta (mediados de xuño-mediados de setembro, Nadal e Semana Santa): de luns a venres de 10:00 a 19:00, sábados de 10:00 a 20:00 e domingos de 10:00 a 14:30
Reservas para grupos: Cun mínimo de 72 horas de antelación, no 981 359 682 ou en exponav@exponav.org. A visita é gratuíta para estudantes.