A zona norte da provincia da Coruña é un xeodestino galego que merece moito a pena visitar, especialmente polos seus cantís, as praias salvaxes e polas súas extensas lagoas. Grazas ao traballo conxunto dos Concellos de Cariño, Cedeira, Cerdido, Moeche, Ortigueira, San Sadurniño e Valdoviño, este territorio, duns 630 quilómetros cadrados de superficie, busca se converter no Xeoparque do Cabo Ortegal, o segundo en Galicia. Esta iniciativa englóbase dentro do novo concepto introducido pola Unesco para impulsar o desenvolvemento do territorio. Os sete municipios apostan polos valores naturais e culturais da zona e traballan conxuntamente para potenciala no plano produtivo, cultural e histórico, así como para facer do lugar o motor dun turismo de calidade.

Nestes percorridos poderemos ver formacións rochosas únicas e espectaculares como as do Macizo do Limo en Cariño ou as do litoral de Teixido en Cedeira, así como os restos volcánicos de hai 470 millóns de anos que podemos atopar en Ortigueira. Outro destino interesante é a antiga explotación mineira de cobre que hai en Moeche, onde se poden observar estalactitas e estalagmitas de cor azul, verde, branca e negra. Os itinerarios inclúen tamén a visita á única praia de area negra non volcánica de todo o planeta e a lugares nos que houbo no pasado afloramentos de lava, granitos negros ou glaciares.