Existen diferentes rutas guiadas para descubrir os segredos xeolóxicos da zona, da man de Francisco Canosa, un dos promotores do proxecto e autor da guía xeolóxica onde se recollen os sete itinerarios para coñecer o xeodestino en profundidade. Co Proxecto do Xeoparque de Cabo Ortegal búscase promover e difundir o sustrato xeolóxico da área que comprende, así como poñelo en valor, non só para os máis de 28.000 habitantes dos municipios implicados, senón para que este sexa un referente turístico e de divulgación sobre o patrimonio xeolóxico.

Aínda que no ámbito do xeodestino existen numerosos puntos de interese, nos percorridos propostos por Canosa é posible coñecer elementos tan interesantes e de gran
valor como o Macizo do Limo en Cariño ou as formacións rochosas e o litoral de Teixido en Cedeira. Neste último punto atópanse tamén os cantís máis elevados da Europa Continental, de 600 metros de altitude.

Ademais, no xeoparque existen grandes acumulacións de minerais no interior de covas, como en Cerdido ou Moeche, onde hai estalactitas e estalagmitas de cor azul e verde que se atopan nas antigas minas de cobre. Por outra parte, esta superficie posúe tamén unha importante diversidade de fauna e flora, razón pola que todo o litoral ten algún grao de protección de ámbito europeo.

Este territorio permite a adultos e escolares ser testemuña dun dos periodos máis apaixoantes da historia do planeta. O Xeoparque do Cabo Ortegal xorde da importancia da xeoloxía na zona, pero persegue tamén alcanzar o desenvolvemento sostible, onde se contribúa á dinamización social, cultural e económica dos concellos implicados, convertendo a este espazo nun destino turístico de calidade.