O municipio de San Sadurniño alberga dous dos máis importantes recursos didácticos de toda a comarca relacionados coa natureza: o arboreto e a horta de conservación de froiteiras Carlos Fornos. O actual curso escolar é unha excelente ocasión para visitalos, xa que no 2019 fanse dez anos desde que se puxeron en marcha estes proxectos na denominada leira da Cortiña, á beira do río Grande de Xubia. Achegarlle á rapazada o coñecemento das árbores autóctonas galegas é, precisamente, un dos principais obxectivos do arboreto, un xardín botánico que se atopa dividido en zonas representativas das nosas principais formacións boscosas: a carballeira, o souto, o bidueiral, o bosque de ribeira, o faial, o sobreiral e a fraga. Percorréndoo, a cativería das escolas poderá observar as diferenzas entre un freixo, un carballo ou un loureiro e aprender a identificar un salgueiro ou un castiñeiro. A excursión desenvólvese nun amplo espazo de lecer no que, ademais, poderán descubrir as esculturas do artista local Carlos García, que reproducen desde personaxes de contos infantís como Pinocho ata a deusa precristiá Navia. Este impresionante enclave situado a carón do paseo do río Xubia e do emblemático Pazo da Marquesa é un punto de encontro para compartir un día en familia. Ao longo do ano alberga outros eventos multitudinarios, entre eles a Carreira Popular e a Feira Rural. A visita complétase coa horta de conservación de froiteiras autóctonas Carlos Fornos, na que se xuntan máis de 500 especies de árbores co obxectivo de recuperar variedades de froiteiras galegas en risco de extinción.