Unha das mellores panorámicas da comarca é a que atopamos desde o Monte de Ancos, que cos seus 262 metros de altitude ofrece unhas vistas impresionantes de toda a ría de Ferrol.

Desde este miradoiro é posible contemplar en días despexados, non só a desembocadura do río Grande de Xuvia e a zona de Ferrol, senón que
tamén se alcanza a ver a vila de Sada e a cidade de Coruña.

Para chegar ata o punto máis elevado, onde se atopa o miradoiro, débense percorrer cerca de tres quilómetros, onde a pendente no seu tramo central é do 14%, polo que non é unha actividade apta para facer con nenos pequenos nin tampouco en días excesivamente calorosos. Porén, a área conta cun espazo de estacionamento para coches e autobuses.

Neda é unha vila cunha íntima conexión coa auga e a natureza, que se ve reflectida en toda a súa contorna. A Fervenza do Río Belelle está situada na parroquia do Roxal, e é unha das paisaxes fluviais máis atractivas da zona.

Para chegar ata ela pódese facer unha ruta circular desde o pazo de Isabel II, unha antiga fábrica de tecidos, cun aparcadoiro público ao seu carón. Este camiño discorre á beira do Belelle, onde antigamente chegaron a existir sobre 40 instalacións, entre muíños, fábricas e ferrerías. A fervenza conta cunha caída de 45 metros e varias pozas na súa base, onde é moi habitual ver a xente dándose un baño durante o verán.

Outro dos espazos naturais de interese no concello é a Área recreativa da Ponte da Cobeluda, que conta cunha piscina natural de 50 metros de longo e 10 de ancho, creada polo río Castro. Actualmente neste emplazamento hai un parque infantil, lareiras e unha zona de merendeiro, que completan a oferta de servizos do lugar.