Coa furia, o campesiñado derrubou o castelo de Moeche pero as tropas “do Mao” e do seu aliado conseguiron a vitoria. Anos máis tarde, xa en 1467, produciuse a Segunda Revolta Irmandiña. Os campesiños saíron derrotados de novo e foron obrigados a reconstruír o castelo. A finais do século XIX, a fortaleza pasou ao poder da Casa de Alba, que puxo en venda o edificio por 3.000 reais ao consideralo “pedra do montón”. A presión social, co arqueólogo Federico Maciñeira como cabeza visible, conseguiu evitar a súa demolición e, grazas a iso, a construción segue en pé e constitúe un lugar interesantísimo cun patrimonio excepcional. Todos os anos, a veciñanza e visitantes conmemoran a revolta campesiña realizando un paseo nocturno con fachos ata o castelo, recreando o momento en que o campesiñado decidiu destruír o castelo en sinal de protesta contra o señor Andrade.

É unha das feiras máis antigas da zona e, de feito, existen referencias dela desde o século XVIII. Conserva a esencia daqueles tempos e xoga un papel fundamental para a economía local. Cada 23 de abril celébrase nos arredores do castelo a tradicional Feira do Cabalo, á que chegan visitantes de diferentes puntos da xeografía galega e incluso de Asturias ou do norte de Portugal. Durante a xornada pódese gozar de diferentes competicións ecuestres, mercar produtos locais ou degustar a gastronomía da zona grazas aos postos de comida que se instalan no lugar.