As Fragas do Eume están recoñecidas como un dos bosques atlánticos costeiros mellor conservados de Europa. Coas súas 9.000 hectáreas de extensión é o segundo bosque máis grande de Galicia e nel habitan diferentes especies arbóreas que en conxunto forman unha contorna natural única.
Desde a Deputación da Coruña promóvese o coñecemento deste patrimonio entre os escolares a través de propostas de turismo escolar, entre as que se inclúen rutas polas Fragas do Eume. O obxectivo destas iniciativas é inculcarlle aos nenos e nenas o interese por descubrir a contorna da provincia e o valor da conservación e preservación destes contornos naturais.
“O segredo do Eume” é o itinerario proposto para adentrarse no bosque eumés e descubrir o Mosteiro de Caaveiro, un templo do século X erixido no alto dun montículo rochoso entre os ríos Eume e Sesín. Dentro do recinto existe un pequeno centro de interpretación do patrimonio do mosteiro onde se explican as distintas estancias que albergaba: as igrexas, a sancristía, o cabildo, o arquivo, a torre do campanario, etc.
Ademais desta, existen catro rutas escolares máis para percorrer outros puntos da provincia, adaptables segundo as necesidades e intereses de cada centro:
“Testemuñas de pedra” traza un itinerario desde o Pazo das Torres do Allo, un dos máis antigos de Galicia, ata o castelo de Vimianzo, datado no século XIII.
“Ritual e tradición” é unha ruta para coñecer a historia da tradición da olería facendo parada no ECOmuseo Forno do Forte en Buño. A excursión complétase cunha visita ao Dolmen de Dombate, mostra da arte megalítica da provincia.
No itinerario do “Bosque animado”, descubrirán as históricas casas señoriais galegas coa visita a dúas vivendas, o Pazo de Mariñán e a Villa Florentina, inspiración da novela de Wenceslao Fernández Flórez que bautiza a ruta.
“Romanos no Mandeo” inclúe a visita ao Centro de Interpretación de Teixeiro para coñecer o patrimonio natural das ribeiras dos ríos galegos.