A antiga prisión de San Campio é un edificio do século XVIII que formaba parte, con outros seis, do primitivo Arsenal de Ferrol deseñado polo enxeñeiro militar Julián Sánchez Bort. Foi un cárcere onde chegou a haber ate 1.500 presos, e hoxe acolle o Museo Naval de Ferrol, un espazo que naceu coa función fundamental de aloxar moitas pezas recuperadas do pecio da fragata Magdalena, afundida na ría de Viveiro no ano 1810. Alí podemos ver desde pezas de vaixela ata munición e outros obxectos procedentes desta embarcación. O museo chama a atención das visitas mesmo desde antes de entrar, porque ten unha gran colección de áncoras de todas as épocas e tamaños que é única no mundo, pero tamén soi moi interesantes para os escolares os mascaróns de proa que se exhiben por toda a planta baixa do edificio.

O Museo da Construción Naval, xestionado pola Fundación Exponav, é un destino de especial interese para os escolares porque o sector naval é o principal sinal de identidade de Ferrol como cidade e o medio de vida de moitas familias de toda a contorna. A visita achéganos á evolución dos estaleiros, desde a carpintería de ribeira ata os modernos sistemas de construción, pero tamén nos permite coñecer un edificio concebido no século XVIII como forxa para o Arsenal que foi rehabilitado con gran coidado e que mantén as súas impresionantes bóvedas e as características chemineas na cuberta. Maquetas, barcos reais, ferramentas de traballo, planos… un sinfín de elementos lévannos nun percorrido por toda a historia da construción naval. Hai pezas moi especiais, como a xigantesca caderna que dá a benvida aos visitantes e, sobre todo, os restos da fragata Magdalena, afundida nas costas de Viveiro no ano 1810 e recuperada do fondo do mar a mediados dos anos 70 do pasado século.

A parroquia de Esmelle é un dos territorios naturais máis relevantes de Ferrol. Catro regatos cruzan o val e permitiron na antigüidade a construción de 22 muíños, ademais de moitas fontes e lavadoiros que hoxe constitúen o patrimonio cultural da zona. No ano 2003, os veciños iniciaron o Proxecto Esmelle co obxectivo de rehabilitar esas edificacións derruídas e converter a zona nun lugar de referencia para turistas. Hai tres rutas de sendeirismo aptas para os escolares que poden facerse a pé ou en bicicleta, e existe a posibilidade de que os integrantes da Asociación de Veciños sexan os guías do grupo. A ruta dos muíños permite visitar todas as edificacións que noutros tempos formaban parte da vida cotiá da xente. A AVV pon a disposición das escolas unha unidade didáctica para traballar este tema nas aulas. A ruta da poza da lagoa sae de San Xoán de Esmelle e ascende por un antigo camiño militar rodeado de natureza ata chegar á Poza da Lagoa. O miradoiro de Pedrouzo, desde onde se pode contemplar toda a Costa Ártabra, é un dos seus principais atractivos.