O Museo da Construción Naval da Fundación Exponav vén de cumprir dez anos e hoxe está consolidado como un dos principais destinos das visitas escolares. Atópase no edificio das Ferrerías, onde no século XVIII se desenvolvían tarefas de forxa para o Arsenal e que foi recuperado mantendo a súa imaxe orixinal.
A visita ao museo supón un completo percorrido pola HISTORIA DA CONSTRUCIÓN NAVAL, desde os primeiros barcos ata os máis modernos a través de maquetas e modelos e de elementos relacionados coa navegación. As recreacións de antigos navíos de guerra comparten espazo con barcos reais, desde un snipe ata un bote polbeiro pasando por unha traiñeira ou un pesqueiro tradicional.
Chaman a atención UNHA ESPECTACULAR CADERNA -unha peza que constitúe o esqueleto do barco- e partes do CASCO DA FRAGATA MAGDALENA, afundida nas costas de Viveiro no ano 1810 e recuperada do fondo do mar a mediados dos 70 do pasado século.