A parroquia de Esmelle é unha das máis importantes zonas naturais de Ferrol. Desde o ano 2003, a súa asociación de veciños desenvolve un proxecto de posta en valor do seu patrimonio material e inmaterial que está a facer de Esmelle un lugar de referencia para os afeccionados ao sendeirismo ou a bicicleta, entre outras actividades.
Existen tres rutas moi axeitadas para unha excursión escolar xa que ao percorrido polas súas fermosas paisaxes se engade unha importante compoñente didáctica. A denominada RUTA DOS SENTIDOS atravesa o que Álvaro Cunqueiro chamou “selva de Esmelle”. Polo camiño atópanse unha serie de paneis que recollen fragmentos da súa obra “Merlín e familia” e mesmo hai unha estatua dedicada ao mago xunto ao Muíño de Otero.