O concello de Cerdido conta cun dos mellores lugares para unha excursión escolar, a área recreativa do Castro. Este lugar, situado sobre a acrópole (Croa) do antigo castro de Cerdido, ten unhas magníficas instalacións e constitúe a última parada do roteiro do río Pontellas, unha ruta de case dous quilómetros de lonxitude coa que somerxerse na natureza durante 45 minutos. O percorrido está rodeado de especies de ribeira como bidueiros, carballos, castiñeiros, abeleiras e ameneiros. O inicio do percorrido atópase no Muíño de Máximo, aínda sen rehabilitar e de titularidade privada. Ao longo da ruta podemos ver tamén outras construcións fariñeiras e unha pequena central eléctrica. Ademais, atoparemos pontes de pedra que permiten cruzar o río sen dificultade e engaden ao itinerario un valor etnográfico único. O traxecto remata no lugar do Castro, un antigo poboado da Idade de Ferro que aínda conserva as murallas e o foso.