A diversidade biolóxica das augas de Cedeira é o motor da súa importante tradición pesqueira, que caracterizou e impulsou á vila desde o seu nacemento. Esta riqueza valeulle ademais á ría cedeiresa a declaración de Reserva Mariña de Interese Pesqueiro no ano 2009, o que favoreceu a protección e explotación sostible do seu fondo mariño.

Un dos espazos chave para achegarse á economía da localidade é a Lonxa de Cedeira, que é visitable concertando a cita previamente coa confraría. Neste lugar, os nenos e nenas poden aprender o funcionamento deste tipo de instalacións, o proceso de compra-venta de peixe, os tipos de etiquetado e as técnicas de pesca da frota local.

Outra visita de gran interese para facer co alumnado é o Museo Mares de Cedeira, que alberga nas súas salas de exposición diferentes elementos que dan conta da conexión entre o pobo cedeirés e o mar: embarcacións, aparellos de pesca, útiles de navegación, fotografías… O museo abriu as súas portas no 2016 e desde entón a súa colección non deixou de crecer grazas as doazóns de pezas da veciñanza. Ademais, presume de contar cunha gran colección de malacoloxía, cedida por Manuel Suárez, con máis de 5.000 cunchas de bivalvos e gasterópodos.

O museo ofrece visitas guiadas para os centros educativos axendando previamente a data. Ademais, o profesorado pode solicitar a organización de distintas actividades lúdicas. Para os alumnos máis maiores realízanse obradoiros de nudos mariñeiros e lectura de cartas náuticas. E para todas as idades, o museo estreou este ano unha actividade con motivo do Día dos Museos consistente nun xogo no que o alumnado, organizado en pequenos equipos, busca pistas agochadas polas instalacións ata chegar a unha mensaxe oculta.

Desde hai un par de anos, este museo está integrado na Rede de Espazos Museísticos Atlánticos (REMA), á que pertencen outros espazos de difusión do patrimonio marítimo e pesqueiro de Galicia, Asturias e Portugal.

A Serra da Capelada é un conxunto montañoso de gran extensión que abrangue o litoral dos concellos de Cedeira, Cariño e Ortigueira. Trátase dunha zona de gran beleza paisaxística e valor xeolóxico que forma parte do proxecto do Xeoparque do Cabo Ortegal.

A Capelada presume de contar cos cantís máis elevados da Europa continental, que ofrecen unhas vistas privilexiadas da costa do noroeste atlántico. O pico máis alto deste conxunto atópase en Vixía Herbeira, de 620 metros sobre o nivel do mar, que recibe o seu nome pola garita de Herbeira, unha pequena construción de pedra que data do século XVIII e servía para a vixilancia costeira. Dende o seu miradoiro poden divisarse as Illas Sisargas e a Punta de Estaca de Bares. Ademais, é habitual atopar na contorna cabalos e vacas en liberdade. Unha vez ao ano, no mes de xuño, celébrase a rapa das bestas, unha tradición ancestral na que os cabalos son guiados ao recinto do curro para cortarlles as crinas.

No medio do fermoso paraxe da Capelada atópase o máxico pobo de Santo André de Teixido, envolto en numerosos mitos e lendas e espazo de culto relixioso xa dende tempos prerrománicos. Existe unha crenza popular que di que a Santo André “vai de morto quen non foi de vivo” reencarnado nun insecto ou réptil. Quizais este sexa un dos motivos polos que o seu santuario é o segundo maior centro de peregrinaxe de Galicia despois de Santiago de Compostela.

Un dos mellores xeitos de visitar a Serra da Capelada e aprender sobre o seu patrimonio xeolóxico é aproveitando algunha das catro xeorrutas guiadas polo xeólogo Francisco Canosa e gratuítas (ver páxinas sobre o proxecto do Xeoparque).

Ademais, pola Capelada e Santo Andrés de Teixido vai o coñecido como Camiño do Mar, unha variante do Camiño do Norte en vías de ser recoñecido como Ruta Xacobea a Santiago e que ten a particularidade de ser o único percorrido que pasa polos dous puntos de peregrinación de Galicia.