Na parte alta do barrio destacan os miradoiros da Rúa Antiga, O Pósito e O Castro, cunhas vistas impresionantes da localidade. Ademais, nesta zona atópanse prazas como a da Porta da Pulida, onde se celebraba antigamente o mercado e as festas, ou a igrexa parroquial de San Bartolomé, na parte máis alta da vila, que data de 1923.

Outro dos puntos de interese de Cariño é a praia da Concha e o seu paseo marítimo, situados moi preto do barrio mariñeiro. Ademais, desde o areal accédese á ruta de sendeirismo da Figueiroa. Esta área de natureza é un lugar de gran atractivo para os rapaces e rapazas, que poden gozar da praia se o tempo acompaña.

Como actividade complementaria tamén é interesante para os escolares unha visita á nave das redeiras, onde se elaboran de xeito artesanal as redes de pesca.

Como parte do Proxecto do Xeoparque do Cabo Ortegal, a riqueza xeolóxica de Cariño é elevada, destacando na contorna do Cabo a presenza de rochas de orixe metamórfico coma Afibolitas, Granulitas ou Gneises e o maior e mellor afloramento de Ecloxitas do mundo.

A meirande parte do municipio conta con algún tipo de protección medioambiental, e é un lugar excepcional onde observar diferentes aves. Pola súa situación xeográfica, Cariño é punto de referencia para ornitólogos, e en concreto dos coñecidos como “twitchers”, que son aqueles especialistas que percorren centos de quilómetros para contemplar unha nova especie divagante. As mellores localizacións para practicar “birding” son a praia da Concha, a ría e os prados próximos, sendo o outono a mellor época do ano para realizar esta actividade, na que o alumnado pode desfrutar dunha xornada de inmersión na natureza.

O mellor momento da industria da salgadura foi nos anos 60, cando a vila de Cariño contaba con 24 fábricas e unha poboación de 5.000 habitantes, que foi medrando cada vez máis da man desta actividade económica.

A día de hoxe algunhas destas empresas tradicionais seguen funcionado. É o caso da Conserveira “La Pureza”, que elabora artesanalmente conservas de pescados e mariscos desde 1924.

Tamén ofrece a través da súa marca Amieiro marmeladas e conservas vexetais. De momento ten suspendidas as visitas guiadas á fábrica pola pandemia e a súa recuperación depende da evolución da situación sanitaria. O obxectivo é que os nenos e nenas fsexan testemuñas de todo o proceso, desde a selección das materias primas ata o enlatado e os diferentes controis de calidade que pasan todos os seus produtos.