Ao seu paso por Narón a ruta xacobea ofrece ao camiñante un itinerario de pouca dificultade con varios puntos de interese nos que facer paradas. O percorrido, que comeza no polígono da Gándara e remata na desembocadura do río Xuvia, ten unha extensión de pouco máis de seis quilómetros polo que pode facerse o tramo completo nunha saída escolar dun día. Ademais, é posible enriquecer a experiencia solicitando o acompañamento de Andrés Pena Graña, o historiador municipal.

O primeiro lugar no que vale a pena deterse é o mosteiro de San Martiño de Xuvia, unha construción de estilo románico cuxa orixe se remonta ao século IX e que viviu o seu maior esplendor no XII, cando se adheriu a orde de Cluny. Recoméndase visitar o interior da igrexa para mostrarlle ao alumnado as características arquitectónicas dos templos románicos, concertando previamente unha cita co párroco.

A man dereita do mosteiro, a ruta segue polo camiño do Salto e máis adiante polo lugar de Outeiro, onde se atopa o muíño das Aceas, que funcionou no século XIX recollendo auga das mareas para empregala na moenda dunha das maiores fábricas de fariña de Galicia.

Ademais das xa coñecidas vielas amarelas, ao longo do camiño tamén atopamos indicacións con debuxos de peixes vermellos que mostran a ruta alternativa a Compostela que pasa por San Andrés de Teixido.

O último punto da etapa de Narón é o Paseo Marítimo de Xubia, un extenso espazo verde á beira do río onde se pode aproveitar para descansar, xantar ou xogar cos nenos e nenas.

A peregrinaxe a Compostela pasa nun dos seus tramos polo Concello de Fene, nun itinerario sinxelo e de curta duración –pouco máis de tres quilómetros– ao longo do cal o camiñante pode gozar da paisaxe da contorna e facer paradas en puntos de interese patrimonial. O percorrido discorre por unha parte urbana e outra en plena natureza, aínda que incluso desde os espazos máis verdes é posible divisar o emblemático guindastre de Navantia e os “jackets” que están en construción, nun chamativo e fermoso contraste.
O camiño ten o seu punto de partida no lugar de Conces e continúa pola rúa Fonte do Campo ata chegar ao lugar da Casanova. Pouco despois cruza a estrada N-651 e chega á Casa do Concello de Fene. Dentro da vila pódese aproveitar para facer un descanso visitando a igrexa do Divino Salvador, datada no século XVIII, ou o Museo do Humor Xaquín Marín, un espazo único en Galicia e de atractivo para a rapazada (ver páxina adicada a esta mostra).
Ao final da avenida do Concello haberá que xirar á esquerda e na rotonda tomar dirección á dereita cara a rúa Alcalde Xerardo Díaz. Estas indicacións levan ao camiñante ao lugar de Mundín, onde se atopa un antigo lavadoiro. Neste lugar crúzase tamén por un bosque de árbores caducifolias e eucaliptos polo que se regresa á N-651.
Desde o Rego da Moa camíñase ata Romariz, onde un pequeno camiño de terra a carón dunha zona de hortas conduce ao final do itinerario fenés, o Polígono de Vilar de Colo, que conecta este concello con Cabanas.