XEOPARQUE CABO ORTEGAL
A POSTA EN VALOR DO PATRIMONIO NATURAL
Concellos participantes:
Cariño, Cedeira, Cerdido, Moeche, Ortigueira, San Sadurniño e Valdoviño
A beleza natural de Ferrolterra, un dos xeodestinos da provincia da Coruña, é digna de admirar. O seu fascinante territorio abrangue dende abruptos cantís ata extensas praias de salvaxe ondada e extensas lagoas. Ao norte atopamos a costa máis setentrional da península Ibérica, xusto entre os cabos de Estaca de Bares e Ortegal, e no litoral que baixa cara Cedeira álzanse os cantís máis altos da Europa continental, con máis de 600 metros de altura.
Destas asombrosas terras, o cabo Ortegal e os seus arredores merecen unha especial mención polo seu GRAN VALOR PAISAXÍSTICO E XEOLÓXICO. Estas terras albergan ata 52 LUGARES DE INTERESE XEOLÓXICO E 5 SITIOS DE RELEVANCIA INTERNACIONAL por atoparse neles formacións únicas ou case imposibles de ver en ningún outro lugar do mundo, con praias de area vermella, praias de area negra de orixe non volcánica, afloramentos de lava, granitos negros, restos glaciais e rochas que habitualmente están a máis de 70 km de profundidade e que aquí poden observarse a simple vista.
Por todo isto, a Deputación da Coruña está traballando conxuntamente cos concellos de Cariño, Cedeira, Cerdido, Moeche, Ortigueira, San Sadurniño e Valdoviño nunha proposta para a declaración como xeoparque para a área do cabo Ortegal.
A creación do Xeoparque do Cabo Ortegal contribuirá á promoción e ao desenvolvemento dos municipios participantes, ao mesmo tempo que posibilitará a súa integración na rede europea e global de xeoparques, unha vez a UNESCO emita un informe favorable. Trátase dunha iniciativa coa que se pretende a posta en valor do excepcional patrimonio natural deste territorio, que á súa vez velará pola súa conservación.
Sinerxías entre os concellos
Xosé Regueira, o responsable da área de Plans, Turismo e Patrimonio da Deputación da Coruña destaca que “o esforzo e as sinerxías dos concellos implicados contribuirán á difusión do patrimonio deste territorio”, unha liña de traballo engadiu “na que se vén traballando como parte da estratexia da Deputación da Coruña en relación coa riqueza patrimonial”.
A constitución do Xeoparque do Cabo Ortegal representa unha APOSTA POLO DESENVOLVEMENTO SOSTIBLE DESTE TERRITORIO, cunha estratexia que ten como base os seus recursos naturais.
Apuntes
- Ruta de natureza
- Materias: Educación Física, Ciencias Naturais, Bioloxía, Ciencias Sociais, Xeografía e Historia.
- Idades: ESO-Bacharelato.
