O retorno dos emigrantes a Galicia trouxo consigo un importante impacto social, económico e cultural que deixou a súa pegada para a posteridade mediante a
arquitectura indiana, caracterizada por mezclar elementos construtivos autóctonos con outros de correntes internacionais coma o modernismo, o historicismo, o
eclecticismo ou o racionalismo.

Este tipo de construcións propias dos primeiros 30 anos do século XX, localízanse en zonas rurais ou periurbanas. Teñen unha importante presenza na comarca de
Ferrolterra, e en concreto na península de Bezoucos, onde está o concello de Cabanas.

Na área de San Martiño do Porto atópase Vila Fraián, que podería ser a primeira parada da ruta, por estar situada na estrada que conecta Cabanas con Mugardos. Foi
a vivenda familiar dos irmáns Patiño, reformada mezclando elementos rexionalistas e modernistas en 1920. Moi preto desta vivenda está a de Vista Alegre, que foi levantada polos irmáns Barros nunha etapa máis tardía, combinando o estilo indiano con elementos rexionalistas.