Nos últimos anos moitos colexios elixiron a praia de Ares para organizarlles aos seus alumnos “BAUTISMOS NÁUTICOS». Alí, coa colaboración de diferentes clubs da localidade, póñense á súa disposición tablas de windsurf, paddle surf, kayaks ou embarcacións de vela, cos correspondentes monitores, de maneira que os rapaces poden ir probando diferentes actividades. Ao mesmo tempo adoitan organizar XOGOS DE ATLETISMO divertido na praia, de maneira que ninguén queda parado e a xornada aprovéitase ao máximo.
O Club Scuba, o Club Zona Norte de Windsurf, a escola de atletismo de Paula Mayobre, o Club Náutico e o Club Marítimo de Redes colaboran man a man nesta iniciativa.

De especial interese son a igrexa do mosteiro, co seu ALTAR BARROCO, a portada da sala capitular e uns FRESCOS DO SÉCULO XVI. A visita guiada dura aproximadamente unha hora, pero despois hai posibilidade de facer actividades e xogos na tranquilidade dos xardíns do mosteiro, cos seus claustros nos que poñerse a cuberto se é necesario.
Moi preto, apenas un quilómetro máis arriba, están unhas VELLAS BATERÍAS MILITARES que dan testemuña do valor defensivo que tivo esta zona. Hai túneles subterráneos, que se poden percorrer, polos que no seu momento se movían os canóns antiaéreos. Neste lugar será inevitable facer fotografías da excelente vista de toda a ría, cos CASTELOS DA PALMA E SAN FELIPE na entrada e a cidade e os guindastres dos seus estaleiros ao fondo.
Para rapaces maiores pode ser moi recomendable facer algunha das RUTAS SENDEIRISTAS que pasan por Montefaro.

O percorrido ten un referente fundamental na antiga escola da Tenencia, na que ten a súa sede a Agrupación Instrutiva de Caamouco. É un edificio grande no que o grupo pode refuxiarse en caso de choiva e desde o que se fai o percorrido por rúas peonís case sen coches. No mesmo núcleo de Redes está a PRAIA DE AREA MORTA, na que os escolares poden xogar, e moi preto, un PARQUE DE XOGOS INFANTÍS cunha tirolina.

As CASAS DE REDES están literalmente pegadas ao mar. Desde moitas delas pódese saír directamente en barco, de aí que algúns lle chamen a “VENECIA GALEGA». É tan pintoresco que captou a atención do cine. Almodovar rodou aquí a súa última película, “Julieta”, e tamén unha serie da TVG, “Padre Casares”, levou á pequena pantalla as rúas e as casas de Redes.